Me 61 vota për, asnjë kundër e abstenim deputetët e Kuvendit të Kosovës kanë miratuar rezolutën që kërkon marrjen e masave për adresimin e rritjes së çmimeve të produkteve bazë.
Më 30 qershor Lëvizja Vetëvendosje kishte propozuar që të hartohet një Projektligj që përcakton marzhën e fitimit për produktet bazë me 8 për qind.
Shefja e Grupit Parlamentar të LVV-së, Mimoza Kusari-Lila pati thënë se ajo çfarë propozohet është dhënia e mundësisë së vlerësimit real të kostove të produkteve të importuara dhe atyre të prodhuara në vend.
“Duke i njohur prodhuesve dhe importuesve shpenzime dhe fitimin, por duke siguruar se në asnjë mënyrë nuk do të krijohen hapësira për një pozitë dominuese apo abuzuese, që sjellin fitime të mëdha për një grup të vogël të bizneseve. Në situatën e krizës së inflacionit, e cila nuk ka kursyer as ekonomitë të mëdha, dizajnimi i pakos për mbrojtjen e qytetarëve nga ndikimi i lartë do të varet nga specifikat e ekonomisë së vendit”, pati thënë Kusari-Lila.
Rezoluta e njëjtë nuk kishte pasur kuorum që të votohet as me 21 korrik dhe 3 gusht të këtij viti.
Po ashtu, Kuvendi gjatë kësaj seance ka miratuar edhe raportet e Agjencisë për Informim dhe Privatësi dhe të KOSTT-it për vitin 2021.
