Tetë anëtarë të grupit Huthi u vranë dhe 15 të tjerë u plagosën të martën në përleshjet me forcat qeveritare jemenase në provincën Taiz, tha të mërkurën një burim ushtarak, transmeton Anadolu.
Qendra mediatike e Forcave të Armatosura të Jemenit tha në një deklaratë në X se forcat qeveritare zmbrapsën një sulm të Huthive në zonën Al-Safa të frontit Kalabah, në verilindje të qytetit Taiz në jugperëndim të Jemenit.
Sulmi u zmbraps pas përleshjeve të ashpra me përdorimin e llojeve të ndryshme të armëve, duke shkaktuar viktima dhe humbje të pajisjeve në radhët e Huthive, shtoi ajo.
Në deklaratë nuk u dhanë detaje të tjera për gjendjen e të plagosurve apo nëse forcat qeveritare pësuan viktima.
Grupi Huthi nuk kanë komentuar menjëherë mbi deklaratën.
Jemeni kishte qenë në një periudhë qetësie relative që nga prilli 2022, pas rreth 12 vitesh luftë mes forcave qeveritare, të mbështetura nga një koalicion i udhëhequr nga Arabia Saudite, dhe Huthive të mbështetur nga Irani, të cilët morën kontrollin e kryeqytetit Sana dhe pjesëve të mëdha të vendit në vitin 2014.
Që nga fundi i vitit 2023, pas fillimit të gjenocidit në Gaza, Huthit janë përfshirë gjithnjë e më shumë në armiqësitë rajonale, duke kryer sulme ndaj Izraelit dhe anijeve tregtare në Detin e Kuq, ndërsa rifillimi i luftimeve ka rritur frikën për një rikthim të konfliktit në shkallë të gjerë në Jemen.
