Qeveria e Zelandës së Re po ndërmerr hapa për të ndaluar qasjen në rrjetet sociale për fëmijët nën 16 vjeç, ndërsa një projektligj për këtë çështje pritet të paraqitet në parlament, tha kryeministri Christopher Luxon, transmeton Anadolu.
Luxon tha se një në tre fëmijë kalon pesë orë në ditë në rrjetet sociale, duke paralajmëruar se platformat i ekspozojnë të rinjtë ndaj teknologjisë që krijon varësi dhe presioneve të mëdha që ndikojnë në jetën familjare, gjumin, marrëdhëniet, shëndetin mendor dhe arsimimin.
Në një deklaratë me video në platformën sociale amerikane X, ai tha se gati 40 për qind e adoleshentëve kanë shprehur keqardhje që rrjetet sociale janë shpikur.
“Rrjetet sociale po u shkaktojnë dëm fëmijëve”, tha ai. Projektligji pritej t’u paraqitej ligjvënësve gjatë ditës së sotme.
Nëse miratohet, legjislacioni do t’i mbajë platformat e rrjeteve sociale përgjegjëse, me gjoba të konsiderueshme në rast të mosrespektimit të tij.
Sipas projektligjit, platformat me rrezik të lartë, si Instagram, TikTok, Snapchat, Facebook, YouTube dhe X, do të detyrohen të marrin masa të arsyeshme për verifikimin e moshës, përfshirë vlerësimin e moshës përmes fytyrës, identitetet digjitale ose dokumentet zyrtare të identifikimit.
Kompanitë që nuk respektojnë kërkesat mund të përballen me gjoba deri në 10 për qind të të ardhurave të tyre vjetore globale.
Megjithatë, partnerët e koalicionit të Luxonit, ACT dhe New Zealand First, kundërshtojnë masën, që do të thotë se Partisë Kombëtare në pushtet do t’i duhet mbështetja e opozitës për ta miratuar legjislacionin.
Zelanda e Re i bashkohet një lëvizjeje ndërkombëtare në rritje për kufizimin e qasjes së të miturve në platformat e rrjeteve sociale.
Australia u bë vendi i parë që miratoi një ndalim mbarëkombëtar të rrjeteve sociale për fëmijët nën 16 vjeç, i cili hyri në fuqi në dhjetor 2025, ndërsa Franca, Britania, Danimarka, Malajzia dhe Indonezia kanë miratuar ose propozuar gjithashtu masa të ngjashme që synojnë mbrojtjen e të miturve nga algoritmet dhe përmbajtjet e dëmshme digjitale.
