Një zjarr që shpërtheu të martën mbrëma në qytetin Oita, në ishullin kryesor jugor të Kyushus në Japoni, ka dëmtuar të paktën 170 shtëpi dhe ka detyruar evakuimin e banorëve. Një burrë në të 70-at rezulton i zhdukur, njoftoi Agjencia Japoneze për Menaxhimin e Zjarreve dhe Katastrofave.
Zjarrfikësit dhe helikopterët ushtarakë kanë luftuar për të kontrolluar flakët, të cilat përfshinë edhe një pyll pranë portit të peshkimit ku filloi zjarri gjatë erërave të forta. Pamjet televizive japoneze treguan tym që ngrihej ende mbi shtëpitë e djegura dhe të dëmtuara, ndërsa flakët e dukshme tashmë nuk ishin më prezente.
Një banore tha për agjencinë Kyodo se iku shpejt, duke lënë pas shumicën e sendeve të saj, sepse zjarri “u përhap në një çast”.
Përgjigja ndaj zjarrit përfshiu dhjetëra makina zjarrfikëse dhe mbi 200 zjarrfikës, ndërsa Forcat Tokësore të Vetëmbrojtjes dërguan dy helikopterë UH1 për të ndihmuar në shuarjen e flakëve.
Kryeministrja japoneze, Sanae Takaichi, në një deklaratë të postuar në X, shprehu ngushëllimet për të prekurit dhe premtoi të “sigurojë mbështetje maksimale” për ata që u prekën nga zjarri. /mesazhi
