Pas valës së të nxehtit, Zvicra është përballur me reshje të dendura shiu që kanë shkaktuar përmbytje dhe rrëshqitje dheu. Të hënën ka rënë borë në resortin e njohur dimëror të Zermatt, në lartësinë 1638 metra.
“Temperatura pati një rënie mbresëlënëse, brenda katër ditëve. Të enjten, termometri i stacionit lexoi 31.2 °C. Sot në orën 11.15 ishte 0.5 °C”, raportoi shërbimi i motit, në platformën X (ish-Twitter).
Shumë kalime malore në Alpe, si Gotthard dhe Zimblon, mbetën të mbyllura, për shkak të shiut që filloi mbrëmjen e së premtes. Shërbimet e trenave u anuluan në disa zona, për shkak të rrëshqitjeve të dheut.
Lumi Rhine është vërshuar në luginën nëpër të cilën rrjedh në Zvicër, por deri më tani nuk ka asnjë rrezik për zonat e banuara, siç raporton agjencia zvicerane e lajmeve Keystone-ATS.
Reshjet e shiut do të vazhdojnë edhe nesër, njofton shërbimi meteorologjik. Në male do të bjerë sërish borë, por kjo nuk mjafton për të shpëtuar akullnajat zvicerane.
Zvicra dhe ekosistemi i saj janë veçanërisht të prekur nga ndryshimet klimatike. Situata në akullnajat përshkruhet si dramatike: midis 2021-2022 ato humbën 6% të vëllimit të tyre. /dosja
