Të paktën 13 emigrantë sudanezë kanë vdekur dhe 27 të tjerë besohet të jenë zhdukur pasi varka e tyre e vogël metalike u përmbyt të enjten në brigjet tuniziane, teksa ishin duke kaluar Mesdheun për të arritur në Evropë, kanë bërë të ditur autoritetet.
Roja bregdetare tuniziane ka arritur të shpëtojë vetëm dy persona nga anija e përmbysur 14 kilometra (nëntë milje) nga bregu i portit Chebba dhe po kërkon për të zhdukurit, tha zëdhënësi i gjykatës rajonale, Farid Ben Jha. Të mbijetuarit thanë se gjithsej 42 persona ishin në bord, të gjithë nga Sudani, raportoi AP.
Ata thanë se grupi ishte larguar nga bregu i Sfax-it aty pranë, një pikë që zakonisht përdoret si pikë kalimi për udhëtime të paligjshme me anije nëpër Mesdhe, për në Itali. Varka u përmbyt menjëherë pasi u nis në det, tha Ben Jha.
Përpjekje të tilla migrimi janë shtuar kohët e fundit nga Tunizia, si nga tunizianët ashtu edhe nga persona nga vende të tjera në Afrikë.
Aktivistët e emigracionit dhanë alarmin muajin e kaluar për dëbimet masive dhe arrestimet arbitrare të migrantëve në Tunizi, ku autoritetet po shohin se më shumë emigrantë mbërrijnë për të tentuar kalimin mesdhetar nga kombi i Afrikës Veriore në Evropë.
