Ministria palestineze e Vakëfeve dhe Çështjeve Fetare ka dokumentuar përshkallëzim të shkeljeve ndaj vendeve të shenjta islame gjatë muajit gusht.
Sipas raportit mujor të ministrisë, gjatë kësaj periudhe janë regjistruar 26 hyrje të kolonëve izraelitë në kompleksin e Xhamisë Al-Aksa, ndërsa në Xhaminë e Ibrahimit në Hebron ezani është ndaluar 155 herë.
Ministria tha se kolonët kanë hyrë në Al-Aksa përmes Portës së Magrebëve, nën mbrojtjen e forcave izraelite, ndërsa gjatë hyrjeve janë kryer rituale hebraike dhe veprime provokuese, përfshirë lutje kolektive dhe rite të tjera.
Në Jerusalem, sipas raportit, autoritetet izraelite kanë vazhduar të vendosin kufizime ndaj besimtarëve myslimanë, veçanërisht gjatë ditëve të premte. Gjithashtu është zgjatur për gjashtë muaj vendimi për ndalimin e myftiut të përgjithshëm të Jerusalemit dhe Palestinës, Sheikh Muhammad Hussein, që të hyjë në Al-Aksa.
Në Hebron, ndalimi i ezanit në Xhaminë e Ibrahimit ka vazhduar që nga 21 qershori, ndërsa gjatë gushtit ezani është ndaluar 155 herë. Raporti përmend edhe kufizime të tjera në hyrje dhe përdorimin e pjesëve të objektit për vizita të kolonëve dhe zyrtarëve izraelitë.
Sipas Ministrisë së Vakëfeve, incidentet janë shtrirë edhe në xhami dhe vende të tjera të shenjta islame në disa zona të Bregut Perëndimor. Në një rast, kolonët vendosën flamurin izraelit në minaren e Xhamisë Abu Ubeida në kampin Nur Shams në Tulkarem.
Ministria paralajmëroi se vazhdimi i këtyre praktikave përbën shkelje të rëndë të lirisë së besimit dhe u bëri thirrje komunitetit ndërkombëtar dhe institucioneve të të drejtave të njeriut të ndërhyjnë për ndalimin e shkeljeve dhe ruajtjen e statusit historik dhe ligjor të vendeve të shenjta islame. /mesazhi
