Grupi palestinez për të drejtat e njeriut Al-Haq njoftoi se gjykata e Apelit në Londër ka refuzuar kërkesën e tyre për të apeluar vendimin e mëparshëm të Gjykatës së Lartë, lidhur me eksportin britanik të pjesëve për avionët luftarakë F-35 që shkojnë në Izrael.
Padia, e nisur në dhjetor 2023, kërkonte ndalimin e furnizimit të Britanisë me pjesë që përfshihen në zinxhirin global të prodhimit të avionëve F-35. Gjykata mbajti qëndrimin se këto çështje i përkasin autoritetit ekzekutiv dhe jo kontrollit gjyqësor.
Al-Haq tha se vendimi tregon një “boshllëk përgjegjësie”, pasi lejon që politikat e jashtme të qeverive, përfshirë eksportet e armëve, të mbeten pa mbikëqyrje ligjore, edhe kur ato mund të lidhen me shkelje të ligjit ndërkombëtar humanitar.
Organizata akuzoi Mbretërinë e Bashkuar për bashkëpërgjegjësi në “gjenocidin e vazhdueshëm” të Izraelit në Gaza dhe u bëri thirrje deputetëve britanikë të kërkojnë transparencë të plotë për vlerësimet e qeverisë mbi veprimet e Izraelit dhe të sigurojnë që furnizimi me armë të kalojë nëpër një proces demokratik. /mesazhi
