Nënsekretari i Përgjithshëm i OKB-së për Operacionet Paqeruajtëse, Jean-Pierre Lacroix, gjatë vizitës së tij në Kosovë ka zhvilluar takime me krerët institucionalë dhe përfaqësues të komunitetit ndërkombëtar.
Sipas njoftimit të UNMIK-ut, Lacroix është takuar me kryeministrin në detyrë, Albin Kurti, si dhe me ministrin e Punëve të Jashtme dhe Diasporës në detyrë, Glauk Konjufca.
Në komunikatë theksohet se diskutimet kanë vlerësuar përpjekjet e vazhdueshme të Kosovës dhe progresin e arritur, duke nënvizuar rëndësinë e dialogut dhe bashkëpunimit.
Lacroix ka rikonfirmuar mbështetjen për dialogun e lehtësuar nga Bashkimi Evropian, si dhe angazhimin e UNMIK-ut për forcimin e sundimit të ligjit, mbrojtjen e të drejtave të njeriut dhe ndërtimin e besimit ndërmjet komuniteteve.
Gjatë vizitës së tij të dytë në Kosovë brenda tre vjetësh, ai ka zhvilluar gjithashtu takime me përfaqësues të komunitetit diplomatik dhe organizatave ndërkombëtare.
