Aksioni për pastrimin dhe mirëmbajtjen e hapësirave publike në Prishtinë ka vazhduar edhe gjatë mbrëmjes, me fokus në zonat përreth kontejnerëve të mbeturinave.
Në kuadër të këtij aksioni janë kryer punime të larjes, dezinfektimit, deratizimit dhe dezinsektimit në disa pjesë të kryeqytetit, me qëllim përmirësimin e kushteve higjienike për qytetarët.
Sipas njoftimit të Komunës së Prishtinës, ekipet e terrenit kanë ndërhyrë në lagjet Bregu i Diellit dhe Ulpianë, ndërsa aktivitetet do të vazhdojnë edhe në zona të tjera të qytetit.
Në aksion janë përfshirë ekipet e Drejtorisë së Shërbimeve Publike, Drejtorisë së Shëndetësisë dhe punëtorët në terren.
Nga Komuna kanë bërë të ditur se qëllimi i këtij angazhimi është krijimi i një ambienti më të pastër dhe më të sigurt për banorët, sidomos gjatë periudhës së temperaturave të larta kur kërkohet kujdes i shtuar për higjienën publike.
