Turqia ka dënuar ashpër sulmet me dronë të nisura nga territori irakian dhe të drejtuara ndaj Arabisë Saudite, njoftoi të shtunën Ministria e Jashtme turke.
Sulmet me dronë goditën tubacionin Lindje-Perëndim në rajonet e Riadit dhe Medinës, duke shkaktuar të plagosur. Autoritetet saudite mbyllën përkohësisht tubacionin si masë parandaluese.
Ankaraja përsëriti mbështetjen e saj për sovranitetin dhe integritetin territorial të Arabisë Saudite dhe vlerësoi qasjen e përmbajtur të autoriteteve saudite për të shmangur përshkallëzimin e tensioneve në rajon.
Turqia mirëpriti gjithashtu dënimin e sulmeve nga qeveria irakiane dhe nisjen e menjëhershme të një hetimi për të sqaruar incidentin dhe për të identifikuar përgjegjësit.
Ministria e Jashtme turke bëri thirrje për ndalimin e menjëhershëm të sulmeve që kërcënojnë stabilitetin dhe sigurinë rajonale, duke u kërkuar të gjitha palëve të shmangin veprimet që mund të përshkallëzojnë më tej situatën. /mesazhi
