Një palestinez u vra dhe një tjetër u plagos nga zjarri i ushtrisë izraelite në pjesën qendrore të Rripit të Gazës sot herët, në shkeljen më të fundit të armëpushimit që është në fuqi që nga 10 tetori 2025, transmeton Anadolu.
Trupi i Muhannad Hassan Abu Madinit, 33 vjeç, u dërgua në Spitalin e Dëshmorëve Al-Aksa pasi forcat izraelite e qëlluan në perëndim të vendbanimit Al-Zahra, në pjesën veriore të Gazës qendrore, i tha Anadolu-t një burim mjekësor.
Një tjetër palestinez pësoi plagë të moderuara kur forcat izraelite hapën zjarr në verilindje të kampit të refugjatëve Bureij në pjesën qendrore të enklavës, tha një burim mjekësor në Spitalin Al-Awda.
Automjetet ushtarake izraelite dhe dronët katërrotësh hapën zjarr në drejtim të zonave në pjesën lindore të Gazës qendrore. Anijet ushtarake izraelite hapën gjithashtu zjarr në drejtim të bregdetit të Gazës qendrore dhe veriore, i thanë Anadolu-t burime lokale dhe dëshmitarë.
Në veri të enklavës, ushtria izraelite kreu operacion të gjerë për shembjen e shtëpive dhe ndërtesave të banimit në zonat ku janë dislokuar forcat e saj, në lindje të Qytetit të Gazës. Shpërthimet u dëgjuan në pjesë të mëdha të enklavës, thanë dëshmitarët.
Shkeljet izraelite të armëpushimit kanë vrarë 1.402 palestinezë dhe kanë plagosur 4.881 të tjerë deri të mërkurën, sipas Ministrisë së Shëndetësisë së Gazës.
