Presidenti i Kazakistanit, Kassym-Jomart Tokayev, të dielën shkarkoi nga detyra ministrin e Mbrojtjes, Dauren Kosanov, pas vdekjes së 14 ushtarakëve gjatë një stërvitjeje detare në Detin Kaspik, transmeton Anadolu.
Deklarata përkatëse u publikua në faqen zyrtare të presidencës dhe në rrjetet sociale.
“Kosanov Dauren Zhumatyevich është shkarkuar nga detyra e ministrit të Mbrojtjes së Republikës së Kazakistanit”, thuhet në deklaratën e shërbimit për shtyp të presidencës.
Kosanov u emërua ministër i Mbrojtjes në vitin 2025 dhe u riemërua në këtë post nga Tokayev në shtator.
Më 24 shtator, 17 ushtarakë u morën nga dallgët dhe përfunduan në det gjatë një stërvitjeje detare në rajonin Mangystau, në bregdetin e Detit Kaspik.
Katërmbëdhjetë prej tyre humbën jetën, ndërsa tre u shpëtuan. Për incidentin u hap çështje penale dhe u arrestuan pesë pjesëtarë të Ministrisë së Mbrojtjes, përfshirë shefin e shtabit dhe zëvendëskomandantin e parë të përgjithshëm të forcave detare.
Sipas hetuesve, ushtarakët përfunduan në det teksa po zbrisnin nga një varkë, ndërsa kushtet atmosferike po përkeqësoheshin.
Më 26 shtator, Tokayev urdhëroi krijimin e një komisioni për të kryer një shqyrtim gjithëpërfshirës të situatës në Ministrinë e Mbrojtjes pas incidentit.
