Vendet e Bashkimit Evropian (BE) çdo vit po hedhin më shumë ushqime sesa sasia që importojnë, transmeton Anadolu Agency (AA).
Byroja Evropiane e Mjedisit, e cila është rrjeti i përbashkët i organizatave joqeveritare që punojnë në fushën e mbrojtjes së mjedisit në vendet evropiane, ndau me publikun raportin për prodhimin dhe konsumin e ushqimit.
Sipas raportit, vendet e bllokut evropian në vitin 2021 importuan 138 milionë tonë produkte bujqësore për të cilat janë paguar 150 miliardë euro, ndërkohë në të njëjtin vit u hodhën 153.5 milionë tonë ushqim.
Gruri u përmend si një shembull i ushqimit të shpërdoruar, pasi thuhet se sasia e grurit të shpërdorur nga vendet e BE-së është rreth gjysma e eksportit të grurit të Ukrainës dhe një e katërta e eksporteve të tjera të grurit të BE-së.
Sipas hulumtimeve të organizatave mjedisore, një e pesta e prodhimit të ushqimit në BE shkon dëm pa u konsumuar. Vlerësohet se çdo vit shpërdorohen rreth 143 miliardë euro.
Gjithashtu thuhet se hedhja e kësaj sasie ushqimi është burimi i 6 për qind të emetimeve totale të gazeve serrë.
Në thirrjen e tyre drejtuar vendeve të BE-së, organizatat mjedisore kërkuan që të vendosen në zbatim rregulla detyruese për të reduktuar përgjysmë sasinë e ushqimit të hedhur në plehra deri në vitin 2030 dhe që Komisioni i BE-së të përgatisë një propozim ligjor që do të jetë i pari në botë për këtë subjekt.
Komisioni i BE-së pritet të vendosë objektiva të detyrueshëm në këtë drejtim deri në fund të vitit. Këto rregulla synohen të miratohen në vitin 2023, pas diskutimit nga Parlamenti Evropian dhe Këshilli i BE-së.
Organizata e Kombeve të Bashkuara (OKB) për Ushqimin dhe Bujqësinë (FAO) njoftoi se çmimet globale të ushqimeve u rritën 8 për qind muajin e kaluar.
Çmimet e grurit, misrit dhe sojës tejkaluan gjithashtu kufijtë të arritur gjatë krizës financiare globale në vitin 2008 pas luftës në Ukrainë.
Ekspertët thonë se edhe nëse lufta në Ukrainë përfundon, çmimet e ushqimeve do të mbeten të larta për një kohë për shkak të çmimeve të larta të energjisë dhe plehrave.
