Gjermania ka përgjegjësinë e saj historike pa ”nëse” dhe ”por”, deklaroi ministrja e Jashtme gjermane, Annalena Baerbock në Varshavë, në një konferencë shtypi me homologun e saj polak, Zbigniew Rau duke iu përgjigjur çështjes së reparacioneve të luftës të pretenduara nga Varshava.
”Pra siç e dini, çështja e reparacioneve, për qeverinë gjermane, është temë e mbyllur”, theksoi ajo.
Ministri i Jashtëm polak, Zbigniew Rau nënshkroi dje një notë diplomatike lidhur me kërkesat e vendit të tij për dëmshpërblim nga Gjermania.
“Nota shpreh bindjen e ministrit të Jashtëm polak se palët duhet të ndërmerrnin hapa të menjëhershme drejt një zgjidhjeje të përhershme, gjithëpërfshirëse dhe përfundimtare ligjore dhe materiale për pasojat e agresionit dhe pushtimit gjerman nga viti 1939 deri në 1945″, tha Rau.
Në fillim të shtatorit, një komision parlamentar në Varshavë paraqiti një raport që vlerësonte humbjet e Polonisë në Luftën e Dytë Botërore në mbi 1,3 trilionë euro (1,27 trilion dollarë).
Qeveria gjermane ka refuzuar kërkesën për dëmshpërblime duke iu referuar traktatit “Dy Plus Katër” të vitit 1990. /atsh
