Presidenti francez, Emmanuel Macron ka hedhur poshtë kritikat e lideres nacionaliste të krahut të djathtë, Marine Le Pen dhe të tjerëve se dërgesat e armëve në Ukrainë po dobësojnë aftësinë e Francës për të mbrojtur veten nga sulmet.
“Kjo është edhe e rreme dhe e rrezikshme”, tha Macron për edicionin e së dielës të gazetës ”Le Parisien”.
“Si komandant i përgjithshëm i forcave të armatosura, mund t’ju siguroj se gjithmonë, kur furnizojmë diçka, ne e bëjmë këtë duke ruajtur kapacitetet tona mbrojtëse për territorin tonë, infrastrukturën tonë dhe qytetarët tanë”, shtoi ai.
Le Pen i kishte thënë më herët transmetuesit CNEWS se Franca nuk mund t’i furnizonte Ukrainës me armë për mbrojtjen e saj kundër pushtimit rus në kurriz të sigurisë së saj.
”Të gjitha pajisjet e dërguara në Ukrainë nuk do të jenë në dispozicion të Francës, qoftë për forcat e saj apo për kontrata të tjera furnizimi”, tha ajo.
”Franca nuk duhet të dërgojë më nga obuset e saj ‘Cezar’ në Ukrainë”, tha Le Pen.
Macron akuzoi Le Penin se mbante një “diskurs kapitullues” dhe se ishte ”mike e dhunës shtetërore ruse”.
”Shtetasit francezë duhet të dinë se paratë po shpenzohen për mbrojtjen e vlerave dhe lirisë sonë”, shtoi ai.
Macron kishte thënë më herët se industria franceze do të prodhonte më shumë armë më shpejt dhe se Franca do të merrte armët e shitura në vende të tjera që nuk ishin të nevojshme atje.
