Joe Biden mund të bëhet presidenti i parë në detyrë i SHBA-së që viziton Nagasakin e goditur nga bomba atomike në Japoni, transmeton Anadolu Agency (AA).
Tokio dhe Washingtoni “po shqyrtojnë mundësinë e vizitës së presidentit amerikan Biden në Nagasaki në maj të vitit 2023 kur edhe do të udhëtojë në Japoni për Samitin e G7 në Hiroshima”, raportoi Kyodo News, duke cituar burime të mirëinformuara.
Vizita mund të përkojë me organizimin e Samitit të G7 nga kryeministri japonez Fumio Kishida më 19-21 maj të vitit të ardhshëm.
Nagasaki dhe Hiroshima janë dy qytetet japoneze që u goditën me bomba atomike të hedhura nga avionët amerikanë në gusht 1945, të cilat shkaktuan vrasjen e dhjetëra mijëra njerëzve.
Kishida, i cili vjen nga një zonë zgjedhore në Hiroshima, vazhdon të avancojë vizionin e tij për një botë pa armë bërthamore që kur mori detyrën në tetor të vitit të kaluar.
Ai pritet të shoqërojë Bidenin në vizitën e tij në Nagasaki, diku para ose pas samitit, shtoi raporti.
Ish-presidenti i SHBA-së, Barack Obama vizitoi Hiroshimën në vitin 2016, po ashtu gjatë Samitit të mëparshëm të G7 në Japoni.
Kishida kishte shoqëruar presidentin amerikan në qytetin e goditur nga bomba atomike si ministër i Jashtëm i Japonisë.
Obama kishte ardhur me ftesë të ish-kryeministrit japonez Shinzo Abe, i cili u qëllua për vdekje në fillim të këtij viti gjatë një fushate zgjedhore.
