Izraeli i bëri thirrje kreut të Vatikanit, Papa Françeskut që të lirojë 4 izraelitë që mbahen robër që nga viti 2014 në Rripin e Gazës nga Hamasi, transmeton Anadolu Agency (AA).
Ministria e Jashtme izraelite lëshoi një deklaratë me shkrim për 4 të burgosur izraelitë pasi Hamasi publikoi pamjet e Avera Mengistu, një prej izraelitëve të mbajtur në Gaza prej vitesh dhe qeveria izraelite i konfirmoi këto imazhe.
Sipas deklaratës, ministri i Jashtëm i Izraelit, Eli Cohen i dërgoi letër kreut të Vatikanit Papa Françesku, Sekretarit të Përgjithshëm të OKB-së, Antonio Guterres dhe kryetares së Komitetit Ndërkombëtar të Kryqit të Kuq Mirjana Spoljaric Egger në lidhje me këtë çështje.
Ministri izraelit u bëri thirrje bashkëbiseduesve të tij në letra të “dënojnë Hamasin dhe të bëjnë thirrje për veprime dhe masa urgjente për lirimin e trupave të qytetarëve dhe ushtarëve izraelitë të mbajtur nga Hamasi në Gaza”.
“Është obligim moral i qeverisë izraelite që t’i kthejë trupat e ushtarëve për varrim sipas hebraizmit dhe t’ua dorëzojë familjeve të qytetarëve izraelitë të mbajtur rob”, shkruan Cohen.
Ministria e Punëve të Jashtme izraelite kujtoi se “Papa Françesku u takua me familjet e 4 të burgosurve izraelitë në dhjetor 2022 dhe u premtoi se do t’i ndihmonte ata në kthimin e fëmijëve të tyre”.
Imazhet e publikuara nga Hamasi
Më 16 janar, krahu ushtarak i Hamasit, Brigadat Izzeddin al-Qassam, postoi një video-mesazh të Mengistu-t, një izraeliti me origjinë etiopiane, i cili është mbajtur peng në Gaza për vite me radhë.
Duke iu drejtuar autoriteteve izraelite në pamje, Mengistu tha: “Unë jam i burgosuri Avera Mengistu. Pas gjithë këtyre viteve mundimesh dhe dhimbjesh, deri kur do të jemi këtu robër unë dhe miqtë e mi? Ku është shteti dhe populli i Izraelit?”.
Pas pamjeve, Kryeministria izraelite njoftoi se nuk ishte e mundur të verifikohej autenticiteti i videos së publikuar nga Hamasi në fazën e parë dhe akuzoi Hamasin për minimin e një marrëveshjeje të mundshme për shkëmbimin e të burgosurve. Megjithatë, kryeministri izraelit Benjamin Netanyahu njoftoi dje se ata kishin konfirmuar autenticitetin e imazheve të Mengistu.
Izraelitët e zënë rob nga Brigadat Al-Qassam
Brigadat Al-Qassam njoftuan se 4 izraelitë u kapën robër gjatë sulmeve izraelite në Gaza në vitin 2014.
Pala izraelite, pretendoi se ushtarët e tyre, Oron Saul dhe Hadar Goldin, vdiqën në luftë, por trupat e tyre u mbajtën dhe se dy nga shtetasit e tyre, njëri me origjinë etiopiane (Avera Mengistu) dhe tjetri arab (Hisham es-Sayyid), ishin në Gaza.
Ministria izraelite e Mbrojtjes kishte ndryshuar statusin e ushtarëve Goldin dhe Saul, të cilët më vonë u shpallën të vdekur në luftën e Gazës, në “të zhdukur dhe të burgosur”.
Brigadat Qassam më 28 qershor 2022 publikuan një video të Hisham as-Sayyid, një prej izraelitëve që ata mbajtën rob në Gaza.
Një zyrtar i Hamasit në Gaza, Yahya Sinwar kërcënoi në dhjetor 2022 se “nëse Izraeli vonon marrëveshjen e shkëmbimit të të burgosurve, ai do të mbyllë përgjithmonë dosjen e ushtarëve izraelitë në duart e Brigadave Al-Qassam”.
