Patriarku i Rusisë Kirill I tha sot se Kisha Ortodokse e Ukrainës po përdoret si “një mjet për të nxitur armiqësinë ruso-ukrainase” nga autoritetet ukrainase dhe “patronët e huaj” të tyre, raporton Anadolu Agency (AA).
Duke folur në një mbledhje parlamentare në dhomën e ulët të parlamentit rus, Duma, patriarku tha se ndaj kishës po bëhen sulme për shkak të rëndësisë së saj në pajtimin e mundshëm të popullit rus dhe ukrainas.
Ai shprehu keqardhje për rolin e patriarkut në Istanbul në ndarjen e Kishës Ortodokse të Ukrainës në vitin 2018 dhe e quajti shtypjen ndaj Kishës Ortodokse të Ukrainës si “pjesë e një rendi të jashtëm global”.
“Bëhen bastisje në dioqeza, manastire, famulli, ngrihen çështje penale kundër klerit dhe besimtarëve me pretekste të pahijshme, ndërsa po ashtu diskreditohen edhe në media”, tha ai.
“Faltoret më të rëndësishme ortodokse për popujt tanë rrëmbehen dhe përdhosen. Çdo ditë po bëhen thirrje gjithnjë e më të forta për të ndaluar plotësisht veprimtarinë e Kishës Ortodokse kanonike. E gjithë kjo mund të konsiderohet si pjesë e një rendi të jashtëm global për shkatërrim të Ortodoksisë kanonike brenda një vendi të vetëm – Ukrainës”, tha patriarku rus.
Patriarku Kirill u ankua që organizatat e të drejtave të njeriut injorojnë atë që po ndodh në Ukrainë, duke vënë në dukje se një sjellje e tillë zbulon “paragjykimet e tyre politike”.
Ai tha se Kisha Ortodokse Ruse është e gatshme të ndihmojë në rivendosjen e jetës paqësore pas luftës dhe kërkoi përmbajtje nga “gjykimet e përgjithshme për të gjithë” që u larguan nga Rusia për shkak të “operacionit special ushtarak” në Ukrainë.
Majin e kaluar, Kisha Ortodokse e Ukrainës u nda zyrtarisht nga Patriarku i Moskës Kirill në mes të luftës së Rusisë kundër Ukrainës.
Megjithatë, agjencitë e sigurisë ukrainase pretendojnë se kisha ka mbajtur lidhje të ngushta me Moskën dhe kanë kryer bastisje të shumta në vendet e shenjta të kishës.
