Sekretari amerikan i Shtetit, Antony Blinken, do të vizitojë Turqinë këtë fundjavë për të parë përpjekjet e vazhdueshme të SHBA-së për të ndihmuar reagimin e qeverisë turke ndaj dy tërmeteve që goditën juglindjen e vendit, njoftoi Departamenti i Shtetit, transmeton Anadolu.
Blinken do të vizitojë bazën ajrore Incirlik më 19 shkurt “për të parë nga afër përpjekjet e SHBA-së për të ndihmuar autoritetet turke që t’i përgjigjen shkatërrimit të shkaktuar nga tërmetet e 6 shkurtit”, tha në një deklaratë zëdhënësi Ned Price.
Nga atje ai do të udhëtojë në Ankara për të takuar homologun e tij turk Mevlüt Çavuşoğlu dhe zyrtarë të tjerë të lartë “për të diskutuar mbështetjen e vazhdueshme të SHBA-së për Turqinë dhe popullin turk pas tërmeteve shkatërruese, si dhe mënyrat për të forcuar më tej partneritetin tonë me Turqinë si një aleat i çmuar i NATO-s”, tha Price.
“Sekretari Blinken do të falënderojë gjithashtu Qeverinë e Turqisë për mbështetjen e saj për ndihmën ndërkufitare për zonat e prekura të Sirisë”, shtoi ai.
Vizita e Blinken-it është pjesë e një turneu në tri vende, duke përfshirë edhe Gjermaninë dhe Greqinë. Blinken do të marrë pjesë në Konferencën e Sigurisë së Mynihut më 16 shkurt, ku ai do të trajtojë ndihmën e vazhdueshme ndërkombëtare për Ukrainën dhe “ndihmën për Turqinë dhe popullin sirian dhe përkushtimin tonë për sigurinë transatlantike”, tha Price.
Pas nisjes nga Turqia, Blinken do të vizitojë Athinën dhe do të takohet me kryeministrin grek Kyriakos Mitsotakis, ministrin e Jashtëm Nikos Dendias dhe kreun e opozitës Alexis Tsipras.
Price tha se gjatë këtyre takimeve, Blinken do të “diskutojë bashkëpunimin në mbrojtje, sigurinë energjetike dhe angazhimin tonë të përbashkët për të mbrojtur demokracinë dhe Sekretari Blinken do të nisë raundin e katërt të Dialogut Strategjik SHBA-Greqi më 21 shkurt”.
