Në prag të muajit Ramazan, Shoqata Humanitare Bamirëse “Bereqeti” dhe Qendra e Mbretit Selman nga Mbretëria e Arabisë Saudite, kanë filluar shpërndarjen e 2400 pakove ushqimore, të cilat janë të dedikuara për familjet nevojtare.
Ky aksion gjigant ka filluar sot në kryeqytet, ku u shpërndanë pako ushqimore dhe miell për këto familje, ndërsa aktivitete të tilla do të vazhdojnë në të gjitha qytetet e Kosovës gjatë ditëve në vijim.
Drejtoresha për Mirëqenie Sociale në Komunën e Prishtinës, Adelinë Sahiti, përcolli nga afër këtë aktivitet me ç’rast falënderoi dy shoqatat për kontributin dhe aktivitetet humanitare në kryeqytet.
Aksione të tilla ndërmjet “Bereqetit” dhe Qendrës së Mbretit Salman nga Mbretëria e Arabisë Saudite, ishin zhvilluar edhe vitin e kaluar, ku ishin ndihmuar me produkte ushqimore familjet nevojtare gjatë muajit Ramazan.
