Sindikata franceze e energjisë ‘CGT Energy’ ka njoftuar më shumë “ndërprerje të synuara të energjisë” në kuadër të luftës kundër reformës së pensioneve, një ditë pasi reforma u miratua në parlamentin francez, transmeton Anadolu.
“Ne përsëri do të shkojmë në drejtimin e fikjeve të synuara, atë që ne e quajmë ‘ruajtja e energjisë’, sepse ky në vetvete është një sulm ndaj kapitalit, ndaj atyre që na qeverisin”, tha sekretari i përgjithshëm i sindikatës, Sebastien Menesplier, gjatë një vizite në termocentralin ‘Gravelines’ në Francën veriore.
Menesplier theksoi se “zemërimi është i madh”, duke shtuar, “Ne do t’u tregojmë atyre se jemi të mobilizuar dhe jemi të vendosur”.
Grevistët në sektorin e energjisë kanë shumëfishuar numrin e ndërprerjeve të energjisë që nga fillimi i konfliktit për reformën e pensioneve. Ata gjithashtu kanë vënë në shënjestër drejtpëdrejt zyrat parlamentare apo shtëpitë e politikanëve.
Së fundmi, 43 mijë familje në rajonin Var të Francës jugore dhe 32 mijë familje në rajonin Ardennes të Francës veriore ishin përkohësisht pa energji elektrike.
“Po, veprimet po rëndojnë ekonominë e kompanive tona dhe në mënyrë të pashmangshme atë të shtetit”, tha Menesplier, duke shtuar se “nuk mund ta lëmë këtë masë pa u siguruar se kjo reformë mund të futet në dollap”.
Në termocentralin ‘Gravelines’, përballë të cilit sindikalistët kanë vendosur post-blloqe, tashmë disa ditë operacionet janë pjesërisht të ndaluara, gjë që sipas grevistëve po i kushton shumë para shtetit duke e detyruar atë të blejë energji me tarifa më të larta.
Përveç kësaj, grevat kanë vonuar mirëmbajtjen e reaktorit, gjë që mund të shkaktojë tensione në rrjetin elektrik francez dimrin e ardhshëm.
Mobilizimi i fuqishëm i punonjësve në sektorin e energjisë shpjegohet ndër të tjera me faktin se ata kanë më shumë për të humbur nga reforma sesa grupet e tjera të profesioneve, që kur u paralajmërua heqja e sistemit të tyre të posaçëm i pensioneve.
