Kryeministri i Republikës së Kosovës, Albin Kurti së bashku me Presidenten e Republikës së Kosovës, Vjosa Osmani, ministren e Drejtësisë, Albulena Haxhiu, dhe të shoqëruar nga deputetë të Kuvendit bënë homazhe në fshatin Izbicë të Komunës së Skenderajt, ku forcat serbe vranë 147 shqiptarë, 6 prej të cilëve janë ende të zhdukur, transmeton Anadolu.
Siç njofton Zyra e Kryeministrit, pranë Memorialit të të vrarëve, Kurti tha se kjo masakër ndodhet në aktakuzat e gjashtë krerëve të lartë shtetërorë politikë, policorë e ushtarakë të Serbisë dhe është dëshmi e gjenocidit të Serbisë.
“Ata janë rrëmbyer si njerëz, si shqiptarë e më pastaj pas pushkatimit u janë rrëmbyer edhe kufomat, janë dërguar në Serbi dhe në fund janë zhvarrosur prej atje, por, jo që të gjithë meqenëse 6 ende nuk dihet se ku janë, në Petrovo Sello dhe i kanë sjellë këtu, në atdheun e tyre, në vendlindjen e tyre”, u shpreh kryeministri Kurti.
Ai tha se nuk do ta harrojnë kurrë gjenocidin e Serbisë dhe se do të angazhohen përjetë e vazhdimisht si institucione edhe si qytetarë për drejtësinë, për viktimat dhe familjet e tyre.
Kryeministri Kurti kujtoi edhe Mustafë Dragajn, i mbijetuar i masakrës, i cili pati dëshmuar kundër Sllobodan Millosheviqit në Tribunalin e Hagës.
Masakra e Izbicës ishte një nga masakrat e mëdha të kryera nga forcat serbe gjatë Luftës së Kosovës, në vitin 1999, në komunën e Skenderajt.
