Ministri i Jashtëm i Suedisë, Tobias Billstrom tha se vendi i tij “dënon të gjitha organizatat terroriste, përfshirë PKK-në”, raporton Anadolu.
Billstrom foli në një konferencë për media në Paris së bashku me ministren e Jashtme franceze, Catherine Colonna.
Ministri i Jashtëm suedez tha se me ligjin e ri kundër terrorizmit, i cili hyri në fuqi më 1 qershor, Suedia përmbushi pjesën e fundit të angazhimit të saj sipas memorandumit trepalësh të qershorit 2022 të nënshkruar në Madrid për të adresuar shqetësimet e sigurisë së Ankarasë në lidhje me terrorizmin.
Ai vuri në dukje se qëllimi i Stokholmit është i njëjtë me atë të Ankarasë, që është lufta kundër terrorizmit.
Duke iu përgjigjur një pyetjeje të një gazetari të Anadolu se çfarë ka bërë qeveria e tij në luftën kundër PKK-së, ai përsëriti se “Stokholmi ka përmbushur detyrimet e tij dhe se bashkëpunimi midis policisë suedeze dhe turke është përmirësuar ndjeshëm”.
“Qëndrimi i Suedisë për PKK-në është shumë i qartë. Prandaj ne donim të përmbushnim gjithçka që ishte shkruar dhe vendosëm në memorandum të bëhemi anëtare e NATO-s”, tha Billstrom.
Finlanda dhe Suedia aplikuan për anëtarësim në NATO menjëherë pasi Rusia nisi luftën në Ukrainë në shkurt 2022.
Megjithëse, Turqia ka miratuar anëtarësimin e Finlandës në NATO, ajo pret që Suedia të pajtohet me një memorandum trepalësh të nënshkruar qershorin e kaluar në Madrid për të trajtuar shqetësimet e sigurisë së Ankarasë lidhur me terrorizmin.
Suedia miratoi një ligj kundër terrorizmit në nëntor, duke shpresuar se Ankaraja do të miratojë kandidaturën e Stokholmit për t’u bashkuar me NATO-n. Ligji i ri, i cili hyri në fuqi më 1 qershor, lejon autoritetet të ndjekin penalisht individët që mbështesin grupet terroriste.
Disa ministra të Jashtëm shpresojnë se Turqia do të miratojë kandidaturën e Suedisë përpara samitit të NATO-s muajin e ardhshëm.
Presidenti i Republikës së Turqisë, Recep Tayyip Erdoğan ka thënë se Suedia duhet të bëjë pjesën e saj në luftën kundër organizatave terroriste nëse pret që Turqia të përgjigjet në pritshmëritë e Suedisë për anëtarësim në NATO.
