Dhjetëra mijëra muslimanë në të gjithë Iranin, ku sot festohet Kurban Bajrami, falën namazin e Bajramit nëpër xhami dhe sheshe, raporton Anadolu.
Në qytetin Gonbed-i Kavus në provincën e Golestanit, ku jetojnë kryesisht turkmenët sunitë, muslimanët mbushën sheshin në zonën e hapur për faljen e Bajramit në orët e para të mëngjesit.
Pasi mijëra njerëz, mes tyre edhe fëmijë, mbushën një zonë sa disa fusha futbolli, ata që nuk gjenin vend, iu bashkuan namazit të Bajramit duke shtruar qilimat e tyre të namazit nëpër trotuare dhe në rrugë.
Imami i Xhumasë së Gonbed-i Kavus, Abdulkerim Ahund Javer, i cili drejtoi namazin e Bajramit, i bëri disa rekomandime xhematit në predikimin e tij.
Duke thënë se Kurban Bajrami është një ditë sakrifice dhe bashkimi, Javer tha: “Muslimanët janë të sigurt në duart e muslimanëve. Është e ndaluar për muslimanët të derdhin gjakun e muslimanëve. Ne duhet të mbrojmë njëri-tjetrin dhe të jemi njerëz të sigurt”.
Ai theksoi se dëshmia e rreme dhe marrja e kamatës duhet të shmanget. “Shmangni dëshminë e rreme ashtu siç shmangni mosbesimin”, tha Javer.
