Emisari i BE-së për dialogun Kosovë-Serbi, Mirosllav Lajçak këtë të hënë e ka vizituar Beogradin, ku ka zhvilluar një takim me presidentin e këtij vendi, Aleksandër Vuçiq.
Pas takimit, Lajçak tha se me Vuçiqin kanë folur lidhur me normalizimin e marrëdhënieve midis Kosovës dhe Serbisë dhe kanë bërë një bilanc mbi situatën aktuale në dialog.
“Në diskutimin tonë, u fokusuam në perspektivën strategjike për vitin 2024, bëmë një bilanc mbi situatën aktuale në dialog dhe folëm për hapat e ardhshëm në normalizimin e marrëdhënieve me Kosovën”, ka shkruar ai.
Takimi i fundit midis Kosovës dhe Serbisë për normalizim të marrëdhënieve u zhvillua më 14 shtator të vitit të kaluar.
