“Lutemi që konfliktet, luftërat dhe gjakderdhja ndërmjet njerëzve pa dallim race, ngjyre, feje apo kombi, të marrin fund”. Kështu tha, Myftiu i Kosovës, Naim Tërnava, në mesazhin e tij drejtuar besimtarëve mysliman me rastin e fillimit të muajit të Ramazanit.
Myftiu Tërnava fton të gjithë besimtarët myslimanë që këtij muaji të bekuar t’i përkushtohen me bindje, adhurim, sinqeritet dhe solidaritet, duke i ruajtur e kultivuar lidhjet familjare dhe duke e shtrirë dorën e ndihmës ndaj të varfërve dhe skamnorëve, duke thirrur në forcim të unitetit dhe vëllazërisë dhe duke refuzuar të gjitha format e ndasisë dhe përçarjes ndërmjet vete.
Myftiu shton se Zoti na ka bekuar dhe nderuar që e kemi arritur këtë muaj, andaj, lutet që Zoti siç na ka begatuar me fenë Islame, gjatë muajit Ramazan, të dhurojë mëshirë dhe faljen e tij në të dy botët.
Ramazani është muaji i agjërimit, që do të thotë shmangia e ushqimit dhe lëngjeve, marrëdhënieve seksuale, fjalëve dhe sjelljeve të këqija dhe gjërave të tjera të ndaluara në Islam. Agjërimi është një nga pesë shtyllat e Islamit dhe zgjatë nga agimi deri në perëndimin e diellit.
