Anëtari i Presidencës së Bosnjë e Hercegovinës (BeH), Denis Beqiroviq u takua me Sekretarin e Punëve të Jashtme të Komonuelthit dhe Zhvillimit, James Cleverley dhe i dërguar special i kryeministrit të Britanisë së Madhe për Ballkanin Perëndimor, Stuart Peach, rreth lëvizjeve të autoriteteve të entitetit të BeH-së Republikës Sërpska (RS), të cilat kërcënojnë Marrëveshjen e Paqes të Dejtonit dhe rendin kushtetues të BeH-së, raporton Anadolu.
Beqiroviq vuri në dukje rrezikun e destabilizimit të BeH-së dhe rajonit për shkak të aktiviteteve të rrezikshme anti-Dajton të autoriteteve të RS, njoftoi zyra e tij.
Anëtari i Presidencës së BeH-së tha se kanë dalë të sakta konstatimet se politika e entitetit të RS-së para së gjithash është problem sigurie dhe jo problem politik dhe bëri thirrje për shkarkimin e presidentit të entitetit RS të BeH-së, Milorad Dodik, përpara se të shkaktojë destabilizimin e vendit dhe rajonit.
“Më mirë është të largohet Dodik sesa të lejohet që politika e tij të kërcënojë në mënyrë ekzistenciale qytetarët dhe popujt e BeH-së”, tha Beqiroviq, duke shtuar se është jashtëzakonisht e rëndësishme që një superfuqi botërore si Britania të qëndrojë me vendosmëri pranë BeH-së dhe qytetarëve saj.
Cleverly tha se interesi i Britanisë është ruajtja e paqes dhe respektimi i Marrëveshjes së Dejtonit. Ai shtoi se angazhimi i Britanisë për forcat demokratike dhe të ardhmes së BeH-së është i padiskutueshëm dhe se vendi i tij do të ndërmarrë hapa shtesë në drejtim të stabilizimit të situatës në këtë pjesë të Evropës.
Në njoftim thuhet se Stuart Peach potencoi se Britania si dëshmitare e Marrëveshjes së Paqes të Dejtonit, është aleate e BeH-së dhe njoftoi se Britania do të vazhdojë të mbështesë ruajtjen e pavarësisë, sovranitetit dhe integritetit territorial të BeH-së. Ai shtoi se Britania mbështet rrugën euro-atlantike të BeH-së dhe forcimin e bashkëpunimit institucional.
Beqiroviq shprehu mirënjohjen e tij për angazhimin e vazhdueshëm të qeverisë britanike në BeH dhe programet e ndihmës për reformat ekonomike, forcimin e demokracisë dhe reformat e sundimit të ligjit.
Gjatë bisedës u theksua se Britania do të vazhdojë të ofrojë mbështetje të fuqishme edhe në të ardhmen për të forcuar sigurinë dhe për të garantuar zhvillimin demokratik të vendit.
