Anija turke “Cagri Bey” për shpime në det të thellë ka mbërritur në Somali për një “mision historik”, duke shënuar fillimin e operacionit të parë të Ankarasë për shpime në det të thellë, njoftoi sot ministri turk i Energjisë dhe Burimeve Natyrore, Alparslan Bayraktar, transmeton Anadolu.
“Anija ‘Cagri Bey’ ka mbërritur në Somali për misionin e saj historik”, tha Bayraktar në platformën turke të mediave sociale NSosyal, duke shtuar se operacioni do të hapë “kapitull krejt të ri në historinë e energjisë si të Turqisë ashtu edhe të Somalisë”.
Ai tha se Turqia po fillon fushatën e saj të parë të shpimeve në det të thellë jashtë vendit. “Ne kërkojmë mirësinë e Zotit për operacionin tonë të parë të shpimeve në det të thellë jashtë vendit që shkon përtej kufijve tanë”, tha Bayraktar.
Sipas Ministrisë së Energjisë së Turqisë, anija “Cagri Bey” do të shpojë në pusin “Curad-1” pranë Somalisë dhe pritet të operojë në një thellësi prej 7.500 metrash gjatë një periudhe prej 288 ditësh.
Ministria e ka përshkruar fushatën si aktivitetin e parë të shpimeve në det të thellë të Turqisë jashtë vendit.
Ministri Bayraktar tha më parë këtë muaj se anija do të mbërrinte në Somali të premten dhe se me anijen, Turqia do të fillonte operacionin e saj të parë të shpimit në det të hapur në ujërat e vendit të Bririt të Afrikës.
