Arabia Saudite, Irani dhe Kina bënë thirrje sot për një zgjidhje gjithëpërfshirëse politike të sponsorizuar nga OKB-ja në Jemen, duke riafirmuar mbështetjen e tyre të përbashkët për një kornizë të njohur ndërkombëtarisht për t’i dhënë fund konfliktit në vendin arab, transmeton Anadolu.
Thirrja erdhi gjatë takimit të tretë të komitetit trepalësh saudito-kinezo-iranian në Teheran, për të ndjekur procesin e Marrëveshjes së Pekinit, sipas një deklarate të agjencisë shtetërore saudite SPA.
Takimi u kryesua nga zëvendësministri i Jashtëm për Çështje Politike i Iranit, Majid Takht-Ravanchi, zëvendësministri i Jashtëm saudit Waleed bin Abdulkarim Al-Khuraiji dhe zëvendësministri i Jashtëm kinez Miao Deyu.
Marrëveshja e Pekinit, e arritur më 10 mars 2023, riktheu marrëdhëniet diplomatike midis Arabisë Saudite dhe Iranit pas bisedimeve të ndërmjetësuara nga Kina, duke i dhënë fund një ndërprerjeje që kishte zgjatur që nga viti 2016.
Gjatë takimit, pala saudite dhe ajo iraniane riafirmuan “angazhimin për zbatimin e Marrëveshjes së Pekinit në të gjitha dispozitat e saj dhe për të vazhduar përpjekjet për forcimin e marrëdhënieve të fqinjësisë së mirë midis dy vendeve, përmes respektimit të Kartës së OKB-së, Kartës së Organizatës për Bashkëpunim Islam dhe të drejtës ndërkombëtare, përfshirë respektimin e sovranitetit, integritetit territorial, pavarësisë dhe sigurisë së të dy shteteve”.
Të tri vendet bënë thirrje për “ndalimin e menjëhershëm të agresionit izraelit në Palestinë, Liban dhe Siri dhe dënuan aktet e agresionit dhe shkeljet e integritetit territorial të Republikës Islamike të Iranit”. SPA-ja tha se të tri vendet “riafirmuan mbështetjen e tyre për një zgjidhje të gjithanshme politike në Jemen, në përputhje me parimet e njohura ndërkombëtarisht nën kujdesin e OKB-së”.
Jemeni është zhytur në luftë civile që nga viti 2014, kur grupi Huthi i mbështetur nga Irani mori kontrollin e kryeqytetit Sana, duke detyruar qeverinë legjitime të tërhiqej në jug të vendit.
