Zyrat e ndërtesës së kompanisë Mercedes-Benz në Sindelfingen, pranë Stuttgartit, u bastisën këtë të martë si pjesë e një hetimi ndaj dy menaxherëve të kompanisë që përballen me akuza për korrupsion.
“Aksioni po kryhet për shkak të dyshimit për korrupsion gjatë proceseve afariste”, njoftoi Prokuroria e Shtetit në Stuttgart.
Mediat gjermane shkruajnë se bëhet fjalë për një hetim ndaj dy drejtuesve të Mercedes-Benz-it të cilët kanë marrë ryshfet “në shumën milionëshe” në këmbim të sigurimit të kontratave me furnitorët.
“Të dyshuarit vlerësohen se kanë arritur të ndikojnë në përzgjedhjen e furnitorëve të caktuar”, raportojnë mediat gjermane.
Gjatë kontrollit të kryer në fund të javës së kaluar, në departamentet e prokurimit janë konfiskuar një celular dhe një kompjuter personal. Kompania njoftoi se kërkimi u krye me iniciativën e vetë Mercedes-Benz.
“Mercedes-Benz është viktima në këtë rast dhe ne e bëmë vetë kallëzimin”, njoftoi kompania.
Sipas disa mediave gjermane, menaxhmenti refuzoi të thoshte se sa ishte shuma dhe gjithashtu të konfirmonte se ishte rasti më i madh korrupsioni në historinë e kompanisë. /tch
