Bashkimi Evropian (BE) pret që Greqia të kryejë një hetim “të plotë dhe transparent” për fundosjen e anijes me emigrantë javën e kaluar pranë brigjeve të Kalamatës, transmeton Anadolu.
“Kujtojmë se prokuroria ka nisur hetimet për këtë ngjarje. Është shumë e rëndësishme të sigurohet një hetim i plotë dhe transparent”, u tha gazetarëve Anitta Hipper, zëdhënësja e Komisionit Evropian për çështjet e brendshme.
“Agjencitë e BE-së janë të pranishme në terren për të ofruar të gjithë mbështetjen e nevojshme”, shtoi ajo.
Hipper theksoi gjithashtu se është thelbësore që “shtetet anëtare të BE-së, agjencitë e BE-së dhe partnerët e vendeve të treta” të punojnë së bashku për të luftuar “kontrabandistët që vënë në rrezik kaq shumë jetë”.
Autoritetet greke po kryejnë dy hetime të veçanta për tragjedinë që ka marrë jetën e të paktën 78 personave pasi një anije peshkimi që transportonte refugjatë dhe emigrantë u fundos në brigjet jugore të Greqisë, një nga fatkeqësitë më vdekjeprurëse të këtij viti.
Gjithsej 104 persona u shpëtuan, por numri i viktimave pritet të rritet pasi të mbijetuarit thanë se anija mbante më shumë se 600 emigrantë, kryesisht nga Pakistani, Egjipti dhe Siria.
Sipas vëzhguesve të të drejtave të njeriut, roja bregdetare greke mund të ketë injoruar sinjalet SOS të varkës, ndërsa disa të mbijetuar akuzuan autoritetet greke se ishin “të përfshira drejtpërdrejt” në aksident.
