Bashkimi Evropian (BE) tha se qasja e tyre ndaj Serbisë është e balancuar dhe se ndryshimi i politikave të tyre mund të jetë i mundshëm vetëm me vendimin e përbashkët të 27 vendeve anëtare, transmeton Anadolu.
Peter Stano, një nga zëdhënësit e Komisionit Evropian (KE), iu përgjigj pyetjes lidhur me letrën e nënshkruar nga deputetët e Parlamentit Evropian (PE) dhe senatorët amerikanë dhe e cila kritikon politikën e Perëndimit ndaj Serbisë.
“Në BE ka mijëra parlamentarë. Politikat e reja formohen vetëm me votën unanime të 27 vendeve anëtare”, tha Stano duke shtuar se letra e shkruar nga deputetët nuk mund të ndryshojë asgjë.
Ai tha se BE-ja luan rol vetëm për lehtësimin e tensioneve Serbi-Kosovë. “Qasja jonë ndaj palëve është e balancuar. Por, megjithatë ajo nuk është e pandryshueshme”, tha Stano.
Sipas lajmit të djeshëm të PE-së, një grup politikanësh të nivelit të lartë të BE-së dhe SHBA-së, i dërguan një letër të përbashkët drejtuar Sekretarit amerikan të Shtetit, Antony Blinken, shefit të politikës së jashtme të BE-së, Josep Borrell dhe Sekretarit të Shtetit të Mbretërisë së Bashkuar për Punët e Jashtme, James Cleverly, e cila kritikonte qasjen e perëndimit ndaj Serbisë.
Në letër thuhet se për zgjidhjen e tensioneve në Kosovë duhet të bëhet më shumë presion ndaj Serbisë.
