Automjetet me arkivolet e 8 boshnjakëve të Kotor Varoshit, viktima të luftës së fundit, të cilët do të varrosen më 3 nëntor në qytezën Veçiqi në Kotor Varosh, janë përcjellë mëngjesin e sotëm nga ambientet e Ndërmarrjes Publike Komunale Varrezat e Qytetit Visoko në Bosnjë e Hercegovinë, raporton Anadolu Agency (AA).
Para largimit të tyre, familjarët e viktimave nderuan të dashurit e tyre duke vendosur lule dhe duke u lutur për ta.
Viktimat që do të varrosen këtë vit në Veçiqi u vranë në vitin 1992 dhe eshtrat e tyre u zhvarrosën në lokalitetin Plitska afër Kotor-Varoshit nga varret masive që u zbuluan në vitet 2002 dhe 2004.
Përjashtim bëjnë eshtrat e Raif Alagiç-it, të cilat u zhvarrosën në vitin 2020 në Duboka.
Kryetarja e Organizatës së Familjeve të Dëshmorëve, Luftëtarëve të rënë dhe Personave të Zhdukur “Vrbanja” Kotor Varosh, Munevera Avdiç deklaroi se 7 viktimat e sotme janë nga një grup prej 161 të zhdukurve brenda një dite.
“Analiza e ADN-së vërtetoi identitetin e tyre. Familjet i identifikuan. Mirëpo, atëherë nuk i morën, sepse ishin pjesë të vogla të trupit, kocka. Me kalimin e kohës, humbet shpresa se do të gjendet diçka më shumë. Atëherë më mirë është të pranohet çfarëdo qoftë për të ditur se të paktën ka një varr dhe të kthehet identiteti i viktimave”, tha Avdiç.
Siç tha ajo, tmerret e luftës në Kotor Varosh kanë filluar që në vitin 1991, kur nisën vuajtjet, arrestimet, vrasjet, përdhunimet, dëbimet…
“Këta persona për herë të fundit janë parë më 3 nëntor në shkollën fillore ‘Grabovica’ dhe që atëherë u humben të gjitha gjurmët. Janë kryer krime të shumta. Njerëzit u mbuluan. Ka pasur varre parësore dhe dytësore. Jemi ende në kërkim të 235 boshnjakëve dhe 17 kroatëve. Deri më tani janë varrosur 114 boshnjakë dhe 40 kroatë”, tha Avdiç.
Fahida Ibriçiç, e cila humbi dhëndrin e saj Rifet Berbiç në vitin 1992, kujton ditën kur burri i vajzës së saj u kap në Duboka dhe u dërgua në Grabovicë.
“Që atëherë i ka humbur çdo gjurmë. I gjetën në Plitska, sa pak eshtra janë. Që atëherë nuk dimë asgjë. Kam edhe një vëlla që ende nuk është gjetur”, tha Ibriçiq.
Gruaja e viktimës Rifet Berbiç, Fikreta, ishte 20-vjeç kur burri i saj u largua. Ajo erdhi për t’i dhënë lamtumirën e fundit të shoqit me djalin dhe nipërit e saj.
“Të gjithë po vuajmë, tash e më shumë se 30 vjet presim raporte. U gjet diçka e vogël. Atë mbrëmje, kur ata u larguan, kudo ishte panik. Për gjashtë muaj na granatuan, na vranë me gjithçka. Njerëzit e thjeshtë u qëlluan me granata. Ne ishim nën tokë për gjashtë muaj. Mbretëronte paniku, atje në Vërbanjci, të gjithë ata që u dorëzuan u kapën. Ata vranë të gjithë burrat. Fshati Veçiqi mbeti i vetëm. U nisën drejt Travnikut, drejt territorit tonë. Ne, gra dhe fëmijë ishim në autobusë. Atje lart, në fshatin Çirkino Bërdo i përdhunuan vajzat”, kujton Fikreta, e cila iku me familjen në Kroaci, nga ku pas tre vitesh shkuan në SHBA.
Viktima më e re që do të varroset këtë vit është Kemo (Kasim) Ramiç, i lindur në vitin 1970. Ai ishte 22-vjeç kur u vra ndërsa eshtrat e tij u gjetën në vitin 2002 në lokalitetin Plitska. Së bashku me të prehjen do ta gjejë edhe vëllai i tij i madh Rexho, i cili ishte 23-vjeç kur u vra. Viktima më e vjetër që do të varroset është Sherif (Sulejmana) Beculiç, i cili ishte 37 vjeç në kohën e vdekjes së tij.
Në Veçiq do të varrosen edhe Mujo (Alaga) Alagiç i lindur më 1962 në Veçiq, Raif (Ramadan) Alagiç i lindur në vitin 1966 në Veçiq, Rifet (Mujo) Berbiç i lindur në vitin 1962 në Veçiq dhe Senad (Dervish) Shkoriç i lindur në vitin 1965 në Banja Llukë. Në përputhje me dëshirën e familjes së tij, Shefik (Ale) Pashiç, i lindur në vitin 1960 në Hërvaçan, do të varroset në vendlindjen e tij.
Gjatë vitit 1992, disa qindra civilë boshnjakë dhe kroatë u vranë në zonën e komunës së Kotor Varoshit.
Për krime lufte kundër popullatës boshnjake dhe kroate të Kotor Varoshit, 9 ish-anëtarë të autoriteteve ushtarake dhe civile të Republikës Sërpska janë duke u gjykuar para Gjykatës së BeH-së, në rastet “Boshko Peuliç dhe të tjerët” dhe “Savo Tepiç dhe të tjerët”.
