Ndihmësit e presidentit amerikan, Joe Biden, kanë zbuluar një grup shtesë dokumentesh të klasifikuara në një vend të ndarë nga zyra e tij në Washington, që ai përdori pas largimit nga administrata e Obamas, sipas një personi të njohur me këtë çështje.
Që nga nëntori, pas zbulimit të dokumenteve me shenja të klasifikuara në zyrën e tij të mëparshme, ndihmësit e Bidenit kanë kërkuar ndonjë material shtesë të klasifikuar që mund të jetë në vende të tjera që ai përdori, tha burimi, i cili foli në kushte anonimiteti për Reuters të mërkurën.
Zbulimi fillestar i dokumenteve të klasifikuara në një zyrë të përdorur nga Bideni u raportua për herë të parë të hënën nga CBS News.
Niveli i klasifikimit, numri dhe vendndodhja e saktë e dokumenteve shtesë nuk u bë e qartë. Gjithashtu nuk ishte e qartë menjëherë se kur u zbuluan dokumentet shtesë dhe nëse kërkimi për ndonjë material tjetër të klasifikuar që Bideni mund të ketë nga administrata Obama ka përfunduar.
Ndihmësit e Bidenit kanë shqyrtuar dokumentet e ruajtura në vende përtej ish-zyrës së tij në Washington për të përcaktuar nëse ka ndonjë dokument tjetër të klasifikuar që duhet të dorëzohet në Arkivin Kombëtar dhe të shqyrtohet nga Departamenti i Drejtësisë, tha personi i njohur me këtë çështje.
Shtëpia e Bardhë lëshoi të hënën një deklaratë duke konfirmuar se një “numër i vogël dokumentesh” me shenja të klasifikuara që dukej se ishin nga administrata e Obamës ishin gjetur në një institut kërkimor në Washington, i lidhur me Bidenin, më 2 nëntor.
Dokumentet u zbuluan në një dollap të mbyllur nga avokatët e Bidenit, ndërsa ata përgatiteshin të lironin hapësirën e zyrës në Qendrën “Penn Biden” për Diplomaci dhe Angazhim Global, tha në një deklaratë të hënën Richard Sauber, këshilltar i posaçëm i presidentit. /koha
