Kryediplomati i Bashkimit Evropian (BE), Josep Borrell, tha se BE-ja “nuk do të ndalet” derisa Irani të lirojë zyrtarin nga Suedia i cili ndodhet në paraburgim për më shumë se një vit, raporton Anadolu.
Duke folur me gazetarët në takimin jozyrtar të ministrave të zhvillimit të BE-së në Cadiz të Spanjës, Borrell konfirmoi se një “shtetas suedez që ka punuar për Bashkimin Evropian po mbahet ilegalisht në Iran për 500 ditët e fundit”.
Komentet e tij erdhën pasi e përditshmja amerikane “New York Times” raportoi të hënën se Johan Florus, i cili punonte për shërbimin diplomatik të BE-së, ishte arrestuar në Iran me akuza për spiunazh që nga viti i kaluar.
Sipas raportimit, Florus u arrestua ndërsa kthehej nga pushimet e tij në Iran në aeroportin e Teheranit në prill 2022.
Borrell nënvizoi se autoritetet suedeze kanë “përgjegjësinë e plotë të mbrojtjes konsullore” për Florusin.
Në të njëjtën kohë, ai theksoi se diplomacia e BE-së e ka ngritur intensivisht këtë çështje në të gjitha takimet me Iranin.
“Kjo është shumë në agjendën tonë. Ne nuk do të ndalemi derisa Florus të lirohet”, theksoi Borrell.
