Presidenti rus, Vladimir Putin duhet të kuptojë se ne nuk do të tërhiqemi, ndaj mos prisni që ne të lodhemi, ne nuk do të lodhemi duke ndihmuar Ukrainën, tha përfaqësuesi i lartë i BE-së për Politikën e Jashtme, Josep Borrell.
Deklarata e Borrell erdhi pas mbërritjes së tij në Këshillin joformal të Punëve të Jashtme të BE-së, në Stokholm.
Borrell theksoi gjithashtu se, përveç ndihmës ushtarake për Kievin në frontin e vijës së parë, do të nevojitet edhe një plan mbështetje shumëvjeçare për Ukrainën.
Ministrat e Punëve të Jashtme të Bashkimit Evropian do të diskutojnë marrëdhëniet e ardhshme të bllokut me Kinën, si dhe mbështetjen për Ukrainën e shkatërruar nga lufta.
Presidentja e Komisionit Ursula von der Leyen u kërkoi vendeve të BE-së kohët e fundit të reduktojnë rreziqet që lidhen me varësinë industriale të bllokut. /atsh
