Junta ushtarake e Burkina Fasos ka dëbuar ambasadorin francez në vendin e Afrikës Perëndimore, mes përkeqësimit të marrëdhënieve dypalëshe, raporton Anadolu Agency (AA).
“Ambasadorit Luc Hallade iu kërkua të largohet nga vendi”, tha për AA një burim në Ministrinë e Punëve të Jashtme të Burkina Fasos, duke folur në kushte anonimiteti për shkak të ndjeshmërisë së çështjes.
“Kemi kërkuar zëvendësimin e tij”, theksoi burimi, pa dhënë detaje të mëtejshme.
Ambasada franceze në kryeqytetin Ouagadougou nuk pranoi të komentojë lidhur me çështjen.
Dëbimi i ambasadorit Hallade vjen disa ditë pasi rezidentja e OKB-së dhe koordinatorja humanitare në Burkina Faso, Barbara Manzi, u dëbua gjithashtu në muajin dhjetor dhe u shpall person i padëshiruar.
Po ashtu në muajin dhjetor, junta ushtarake dëboi dy shtetas francezë të akuzuar për spiunazh.
Ndjenjat anti-franceze në Burkina Faso u rritën muajin e kaluar. Ambasadora franceze në Ouagadougou u sulmua dy herë nga protestuesit që kërkonin largimin e Francës nga Burkina Faso.
Vendi afrikan pa dalje në det ishte dëshmitar i dy grusht shteteve vitin e kaluar.
Në janar të vitit 2022, ushtria rrëzoi presidentin e zgjedhur, Roch Marc Kabore. Mës pasigurisë në rritje, një grusht shteti i dytë u organizua në muajin shtator të vitit 2022 nga ushtarë të udhëhequr nga kapiteni Ibrahim Traore, i cili rrëzoi nënkolonelin Paul-Henri Sandaogo Damiba.
