Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus njoftoi se në dy muajt e fundit mbi 170 000 persona kanë humbur jetën si pasojë e COVID-19.
Ghebreyesus, në një vlerësim lidhur me situatën shëndetësore globale tërhoqi vëmendjen mbi rritjen e shënuar në vdekjet javore me burim COVID-19 që nga fillimi i dhjetorit të vitit të kaluar.
“Në tetë javët e fundit për shkak të COVID-19 kanë humbur jetën mbi 170 mijë njerëz. Këto janë vetëm vdekjet e raportuara. Shifrat e vërteta janë më shumë se kaq”, deklaroi Ghebreyesus.
“Nuk do të marr paraprakisht këshillin e Komitetit të Emergjencës, por më shqetëson situata dhe vdekjet në rritje për shkak të COVID-19 në disa vende. Reagimi kolektiv global ndaj pandemisë është edhe një herë nën presion, edhe pse ndodhemi në një situatë shumë më të mirë se para 3 viteve kur filloi pandemia”, tha ai.
Ghebreyesus tha se shumë pak njerëz, veçanërisht të moshuarit, janë të vaksinuar në mënyrë adekuate.
Sipas tij, sistemet e brishta shëndetësore krahas gripit dhe sëmundjeve të tjera kanë vështirësi të përballojnë barrën e COVID-19.
“Mesazhi im është i qartë, mos e nënvlerësoni këtë virus, ai na ka befasuar dhe do të vazhdojë të na befasojë. Virusi mund të vazhdojë të vrasë nëse nuk u ofrojmë mjetet shëndetësore njerëzve në nevojë dhe nëse nuk bëjmë më shumë për të luftuar gjerësisht me informacionet e gabuara”, tha kreu i OBSH-së. /atsh
