Një djalë pesëvjeçar dhe babai i tij, të cilët ishin ndaluar nga Shërbimi Amerikan i Imigracionit dhe Doganave (ICE), janë kthyer në shtëpinë e tyre në Minesota pas lirimit nga një qendër ndalimi në Teksas.
Lajmin e bëri të ditur kongresmeni demokrat nga Teksasi, Joaquin Castro, i cili njoftoi se Liam Conejo Ramos dhe babai i tij, Adrian Alexander Conejo Arias, u liruan nga qendra e ndalimit në Dilley dhe udhëtuan drejt Minneapolisit. “Liam është tani në shtëpi. Me kapelën dhe çantën e tij të shpinës,” shkroi Castro.
Ndalimi i babait dhe djalit shkaktoi protesta jashtë qendrës së ndalimit dhe reagime të forta në mbarë vendin. Departamenti i Sigurisë Kombëtare (DHS) deklaroi se “ICE nuk ka synuar apo arrestuar një fëmijë”.
Kthimi i tyre në Minesota erdhi pasi një gjyqtar federal, Fred Biery, miratoi një kërkesë emergjente nga avokati i familjes dhe urdhëroi lirimin e tyre të shtunën. Në vendimin e tij, gjyqtari e dënoi ndalimin, duke e cilësuar si pasojë e një politike çnjerëzore deportimesh dhe theksoi se fëmijët po traumatizohen për shkak të kuotave ditore të dëbimit.
Ndërkohë që ndodheshin ende në qendrën e ndalimit, kongresmeni Castro kishte deklaruar se djali i vogël nuk po e përballonte mirë ndarjen nga familja, shokët e klasës dhe shtëpia e tij.
Autoritetet amerikane thanë se babai dhe djali kishin hyrë ilegalisht në SHBA, ndërsa avokati i familjes theksoi se ata kishin ndjekur të gjitha procedurat ligjore për të kërkuar azil, duke u paraqitur rregullisht para autoriteteve dhe gjykatave.
Edhe kongresmenia nga Minesota, Ilhan Omar, reagoi në rrjetet sociale duke përshëndetur kthimin e tyre: “Liam është në shtëpi tani. Mirë se erdhe në shtëpi, Liam.”
Rrethana të ndryshme janë raportuar për momentin e ndalimit fillestar, përfshirë akuza nga zyrtarë shkollorë se fëmija u mbajt nga agjentët e imigracionit, gjë që u mohua nga ICE. Avokati i familjes theksoi se babai dhe djali “bënë gjithçka siç duhet” dhe nuk përbënin asnjë rrezik sigurie apo arratisjeje. /koha
