Grupet e të drejtave të njeriut dhe zyrtarët palestinezë raportojnë për shtëpi të djegura, civilë të plagosur dhe arrestime të shumta, pas përleshjeve vdekjeprurëse pranë Nablusit. Ngjarjet pasuan thirrjet e liderëve politikë izraelitë dhe organizatave të kolonëve për “hakmarrje”, duke deklaruar se “duan të shohin gjak” dhe kërkojnë “fshirjen e fshatit Tell”.
Ministri i Financave i Izraelit, Bezalel Smotrich, bëri thirrje për shkatërrimin e fshatrave Tell, Iraq Burin dhe Beit Furik, duke thënë se këto komunitete “duhet të duken saktësisht si kampet e refugjatëve në Nablus dhe Tulkarm”, duke iu referuar shkatërrimeve në shkallë të gjerë të shkaktuara nga ushtria izraelite. “Popullsia atje duhet të evakuohet,” shtoi Smotrich, duke i kërkuar Kryeministrit Benjamin Netanyahu t’i heqë këto zona nga përgjegjësia e Autoritetit Palestinez.
Nga ana tjetër, Ministri i Sigurisë Kombëtare, Itamar Ben Gvir, deklaroi se “për çdo çifut të vrarë, armiku duhet të bartë humbjen e tokës dhe shtëpive”, duke bërë thirrje që strategjia e rrafshimit të qyteteve të tëra në Rripin e Gazës të zbatohet edhe në Bregun Perëndimor.
Këto deklarata vijnë pasi kolonë të armatosur izraelitë, të shoqëruar nga ushtria, mësynë fshatin palestinez Tell. Katër anëtarë të familjes Saifi u vranë nga zjarri izraelit, pasi ushtria pretendoi se njëri prej tyre i kishte marrë armën një koloni, duke e qëlluar atë për vdekje. Sipas Ministrisë palestineze të Shëndetësisë, të paktën 87 palestinezë janë vrarë në këtë territor nga zjarri izraelit që nga fillimi i vitit 2026, duke përfshirë 21 të vrarë drejtpërdrejt nga kolonët.
Thirrjeve për shkatërrim iu bashkua edhe Zvi Sukkot, deputet i partisë së Smotrich, i cili deklaroi se fshati Tell “duhet të kthehet në gërmadhë”, duke postuar gjithashtu në faqen e tij në Facebook një ekran të zi me mbishkrimin: “Hakmarrje”. Mesazhet e analizuara nga grupe bisedash të kolonëve ekstremistë “Hilltop Youth” konfirmojnë thirrje të ngjashme për të “shkatërruar plotësisht fshatin Tell” menjëherë pas lajmit për vrasjet. /mesazhi
