Nevoja e pavarësisë strategjike mes shqetësimit për ndryshimet në politikën amerikane
Në një shkrim të botuar nga Newsweek, gazetari Tom O’Connor raporton se konsulli i përgjithshëm izraelit në Nju-Jork, Ofir Akunis, ka shprehur shqetësim jo aq për luftën me Iranin apo trazirat në Lindjen e Mesme, sesa për një zhvillim të brendshëm në politikën amerikane, të cilin e sheh si kërcënim afatgjatë ndaj aleancës historike SHBA–Izrael.
Sipas Akunis, fitoret e fundit elektorale të kandidatëve progresistë të Partisë Demokratike, të cilët kritikojnë Izraelin dhe ndërhyrjet ushtarake amerikane jashtë vendit, tregojnë se disa amerikanë “në fakt preferojnë ajatollahët sesa administratën amerikane”. Ai bëri dallimin mes kritikës legjitime ndaj një presidenti brenda kornizës demokratike dhe asaj që e quajti një fenomen të ri: preferimin e armiqve mbi kundërshtarët politikë vendas.
Ndonëse shprehu shpresën se Shtetet e Bashkuara do të mbeten gjithmonë krah Izraelit, Akunis pranoi se vendi i tij “do të duhet të përgatitet të jetë më i pavarur sesa ka qenë më parë”. Ai përmendi si shembull sistemet mbrojtëse të prodhuara vendas, si Kupola e Hekurt, që kanë zbutur valët e raketave, dronëve dhe predhave që kanë goditur Izraelin që nga sulmi i Hamasit në tetor 2023.
Pavarësia e shtuar, sqaroi ai, nuk do të thotë izolim: Izraeli synon të vazhdojë ndërtimin e koalicioneve me vende të tjera, përtej aleancës me SHBA-në.
Miq të rinj, armiq të vjetër
Artikulli vë në dukje se Izraeli i ka thelluar vitet e fundit marrëdhëniet me India, Greqinë dhe Qipron — pjesë e asaj që kryeministri Benjamin Netanyahu e ka quajtur “gjashtëkëndëshi i aleancave” — si dhe me Emiratet e Bashkuara Arabe dhe Bahreinin, përmes Marrëveshjeve të Abraham-it të vitit 2020, të ndjekura më vonë nga Sudani dhe Maroku. Akunis përmendi edhe një përmirësim të fundit të marrëdhënieve me Kolumbinë dhe vende të tjera në Amerikën Jugore.
Në krahun tjetër të hartës, Newsweek raporton se zyrtarët izraelitë e shohin me dyshim të thellë formimin e një “kuarteti” të fuqive kryesore sunite — Arabia Saudite, Turqia, Egjipti dhe Pakistani — të lidhur tashmë përmes një pakti të ri mbrojtjeje të nënshkruar të premten. Përfshirja e Turqisë, anëtare e NATO-s, shqetëson veçanërisht Izraelin, në një kohë kur retorika mes Netanyahut dhe presidentit turk Recep Tayyip Erdoğan është ashpërsuar. Akunis e cilësoi Erdoğan-in “ekstrem” dhe “të çmendur”, duke iu referuar kthesës së tij kundër Izraelit para gati dy dekadash dhe mbështetjes për flotiljet aktiviste që synonin thyerjen e bllokadës së Gazës.
“Kemi plane”
Për sa i përket Iranit, Akunis tha se ai mbetet sfida parësore para çdo konfrontimi tjetër të mundshëm, duke kërkuar durim pas pak më shumë se gjashtë muajsh luftë. Ai shprehu besim të vazhdueshëm te presidenti amerikan Donald Trump, por edhe e këshilloi këtë të fundit të mbetet i fortë ndaj Teheranit, duke paralajmëruar se çdo shenjë dobësie perëndimore do të nxiste sulme iraniane.
Sipas raportimit të Newsweek, Akunis rezervoi kritikën më të ashpër për zërat perëndimorë që, sipas tij, e kanalizojnë indinjatën vetëm drejt Izraelit dhe jo drejt Iranit. Ai argumentoi se Gaza mund të bëhet “si Emiratet, Bahreini apo Singapori i Lindjes së Mesme” nëse Hamasi të hiqej nga skena, ashtu siç, sipas tij, Libani mund të lulëzonte pa Hezbollah-un. Zyrtari izraelit foli edhe për plane afatgjata për rikthimin e një linje historike lidhëse mes Bejrutit dhe Kajros, përmes Hajfës, Tel Avivit e Gazës — një projekt që e krahasoi me korridorin hekurudhor Boston–Uashington në SHBA.
Duke mbyllur, Akunis paralajmëroi se, nëse “bota perëndimore” nuk sheh një ndryshim të madh drejtimi në të ardhmen e afërt, dekada e ardhshme “do të jetë shumë e keqe” për të. /tesheshi
