Egjipti dhe Turqia kanë emëruar ambasadorët përkatës, duke i dhënë fund një dekade tensionesh diplomatike mes dy peshave të rënda rajonale, njoftuan të dy vendet.
”Vendimi synon të rivendosë marrëdhëniet normale për të mirën e dy popujve vëllazërorë”, theksoi ministria e Jashtme e Egjiptit në Twitter.
Në një deklaratë të përbashkët, të dy vendet thanë se masa “pasqyron vullnetin e ndërsjellë për të zhvilluar marrëdhënie dypalëshe në përputhje me interesat e popujve turk dhe egjiptian”.
Të dy vendet njoftuan në maj se do të forcojnë lidhjet dhe do të shkëmbejnë ambasadorë kur presidenti egjiptian Abdel-Fattah al-Sissi telefonoi homologun e tij turk Rexhep Tajip Erdogan për ta uruar për rizgjedhjen e tij.
Egjipti ka emëruar diplomatin Amr al-Hamamy si ambasador të tij në Ankara dhe Turqia ka emëruar Salih Mutlu Şen si të dërguarin e tij në Kajro.
Marrëdhëniet midis Egjiptit dhe Turqisë u përkeqësuan në mesin e vitit 2013 pasi ushtria egjiptiane, e udhëhequr në atë kohë nga al-Sissi, përmbysi presidentin e atëhershëm islamist të Egjiptit, Mohammed Morsi.
Partia për Drejtësi dhe Zhvillim e Erdoganit ishte një mbështetëse kryesore e Vëllazërisë Myslimane të Morsit. Si përgjigje, Egjipti dëboi ambasadorin turk dhe uli marrëdhëniet me Ankaranë në nivelin e të ngarkuarit me punë.
Të dy vendet kanë mbështetur gjithashtu palët kundërshtare në Libinë e shkatërruar nga konflikti. /atsh
