Ministrja gjermane e Punëve të Brendshme, Nancy Faeser, ka paralajmëruar se ekstremizmi i krahut të djathtë mbetet rreziku më i madh për demokracinë në Gjermani, transmeton Anadolu.
“Ekstremizmi i krahut të djathtë mbetet një sfidë e vazhdueshme pasi është kërcënimi më i madh ekstremist për rendin themelor demokratik”, tha Faeser para gazetarëve në Berlin gjatë prezantimit të një raporti vjetor mbi ekstremizmin në Gjermani.
Ajo tha se në vitin 2022 numri i krimeve nga ekstremistët e djathtë u rrit me 3,8 për qind duke arritur në rreth 21 mijë raste.
“Përveç kësaj, ekstremizmi i mundshëm i krahut të djathtë, i gatshëm për të përdorur dhunë, është rritur përsëri me 500 raste duke arritur në mbi 14 mijë. Nuk duhet të nënvlerësojmë kurrë rrezikun vdekjeprurës të ekstremizmit të djathtë dhe terrorizmit të krahut të djathtë”, tha Faeser.
Raporti i Zyrës Federale për Mbrojtjen e Kushtetutës tha se numri i personave të caktuar në spektrin ekstremist të krahut të djathtë krahasuar me një vit më parë u rrit me 14,5 për qind në 38.800.
Një nga arsyet për rritjen e mprehtë është se agjencia tani përfshin anëtarë të partisë së ekstremit të djathtë, Alternativës për Gjermaninë (AfD). Ajo po vëzhgohet si rast i dyshuar.
Gjermania është tronditur nga një seri vrasjesh vdekjeprurëse të ekstremit të djathtë gjatë viteve të fundit. Midis tyre është vrasja e një politikani rajonal nga një neonazist i dyshuar, një sulm në një sinagogë në qytetin Halle në lindje të vendit dhe vrasja fatale e nëntë personave me prejardhje migrante në qytetin Hanau.
