BE-ja dhe Turqia duhet të rrisin kontaktet në të gjitha nivelet me një agjendë konkrete dhe pozitive për anëtarësimin e plotë, i tha presidenti Recep Tayyip Erdoğan kreut të Këshillit Evropian të mërkuren, transmeton Anadolu.
Në një telefonatë me Charles Michel, Erdoğan nënvizoi vlerën “e madhe” strategjike të Ankarasë për Evropën, thuhet në një deklaratë nga Drejtoria e Komunikimit e Turqisë.
Erdoğan theksoi rëndësinë e bashkëpunimit në përditësimin e Bashkimit Doganor mes dy palëve, si dhe për liberalizimin e vizave, menaxhimin e emigracionit dhe luftën kundër terrorizmit.
Ai theksoi gjithashtu se trajtimi i drejtë i Turqisë dhe mbështetja për anëtarësimin e saj të plotë në BE do të hapë horizonte të reja në marrëdhënie.
Nga ana e tij, Charles e uroi Erdoğanin për rizgjedhjen e tij si president muajin e kaluar.
Turqia aplikoi për anëtarësim në BE në vitin 1987 dhe ka qenë një vend kandidat që nga viti 1999. Negociatat për anëtarësim të plotë filluan në tetor 2005, por kanë ngecur në vitet e fundit për shkak të pengesave politike të ngritura nga disa vende.
