Presidenti turk, Recep Tayyip Erdoğan, në një bisedë telefonike me homologun e tij amerikan, Joe Biden, ka deklaruar se është “përgjegjësi historike” e Amerikës që sa më parë të sigurojë një armëpushim të përhershëm në Gaza, transmeton Anadolu.
Siç njofton Drejtoria e Komunikimeve e Türkiyes, Erdoğan dhe Biden zhvilluan një bisedë telefonike për të diskutuar sulmet e Izraelit në territoret palestineze, veçanërisht në Gaza, marrëdhëniet dypalëshe, si dhe aplikimin e Suedisë për anëtarësim në NATO.
Erdoğan tha se një armëpushim mund të arrihet shpejt nëse SHBA-ja tërheq “mbështetjen e pakushtëzuar” për Izraelin.
Ai i tha Bidenit se tragjedia njerëzore në Gaza duhet të ndalet, si dhe e paralajmëroi se thellimi dhe zgjatja e sulmeve të Izraelit mund të ketë “pasoja negative rajonale dhe globale”.
Presidenti turk për zgjidhjen e konfliktit Izrael-Palestinë theksoi nevojën për krijimin e një mekanizmi garantues, siç sugjerohet nga Türkiye.
Më tej, Erdoğan theksoi se krijimi i një shteti palestinez të pavarur dhe sovran me Kudsin si kryeqytet të bazuar në kufijtë e vitit 1967 është “zgjidhja më e arsyeshme dhe e përhershme”.
Dy presidentët diskutuan edhe ofertën e Ankarasë për blerjen e avionëve luftarakë F-16 nga SHBA-ja.
Izraeli ka bombarduar Rripin e Gazës nga ajri dhe toka, ka vendosur një rrethim dhe ka ndërmarrë një ofensivë tokësore në hakmarrje të sulmit ndërkufitar nga grupi i rezistencës palestineze Hamas më 7 tetor.
Sipas autoriteteve shëndetësore të Gazës, të paktën 18.787 palestinezë janë vrarë që atëherë dhe më shumë se 50.897 të tjerë janë plagosur.
