Numri i viktimave në Filipine u rrit në 19 sot në Filipine nga përmbytjet dhe rrëshqitjet e dheut të shkaktuara nga musonet dhe ciklonet tropikale “Luis” dhe “Kujira”, transmeton Anadolu.
Këshilli Kombëtar për Reduktimin dhe Menaxhimin e Rrezikut të Fatkeqësive raportoi gjithashtu katër persona të zhdukur, sipas “The Philippine Daily Inquirer”.
Të paktën 2.27 milionë njerëz u prekën nga moti i keq. Më shumë se 94.990 njerëz aktualisht janë strehuar në 919 qendra evakuimi në të gjithë rajonet e prekura.
Të paktën 684 shtëpi u raportuan të dëmtuara, përfshirë 45 që u shkatërruan plotësisht.
Vlera totale e dëmeve në infrastrukturë tani është 1.45 miliardë pesos (23 milionë dollarë), ndërsa dëmi në bujqësi vlerësohet në 135.33 milionë pesos.
