Numri i palestinezëve të vrarë në ofensivën e pamëshirshme izraelite kundër Rripit të Gazës që nga 7 tetori është rritur në 29.313, njoftoi Ministria e Shëndetësisë në Gaza, raporton Anadolu.
Ministria me bazë në Gaza e bëri deklaratën ndërsa sulmet shkatërruese izraelite kundër Gazës hynë në ditën e 138-të.
Ministria tha gjithashtu se 69.333 persona të tjerë janë plagosur në sulmet e vazhdueshme izraelite. Në deklaratë thuhet se gjatë 24 orëve të fundit, ushtria izraelite kreu 11 masakra në të gjithë Rripin e Gazës, ku mbetën të vrarë 118 persona dhe 163 të tjerë të plagosur.
“Shumë njerëz janë ende të bllokuar nën rrënoja dhe në rrugë ndërsa ekipet e shpëtimit nuk mund të arrijnë deri tek ata”, thuhet në deklaratën e ministrisë.
Sipas të dhënave të OKB-së, për shkak të sulmeve izraelite, 85 për qind e popullsisë së Rripit të Gazës është zhvendosur brenda enklavës dhe përballet me mungesë akute të ushqimit, ujit të pastër dhe ilaçeve ndërsa 60 për qind e infrastrukturës është dëmtuar ose shkatërruar.
Izraeli akuzohet për gjenocid në Gjykatën Ndërkombëtare të Drejtësisë (GJND), e cila në një vendim të përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
