Pasi ushtria izraelite filloi sërish të sulmojë Rripin e Gazës mëngjesin e sotëm, Hamasi tha se Izraeli nuk do të ketë sukses në atë që nuk arriti ta bëjë në 50 ditët e mëparshme, transmeton Anadolu.
Anëtari i Byrosë Politike të Hamasit, Izzat al-Rishq lëshoi një deklaratë me shkrim pasi Izraeli rifilloi sulmet e tij pas përfundimit të “pauzës humanitare” në Gaza.
“Me vendosmërinë e popullit tonë dhe heroizmin e rezistencës sonë, ne i kundërvihemi krimeve të armikut, ripërtëritjes së agresionit nazist dhe shënjestrimit ndaj civilëve”, thuhet në deklaratën në llogarinë e Hamasit në Telegram.
Duke theksuar se rezistenca ndaj sulmeve izraelite do të vazhdojë, Rishq shtoi: “Izraeli, duke vazhduar sulmet e tij, nuk do të jetë në gjendje të arrijë atë që nuk mundi ta bëjë në 50 ditët para pauzës humanitare”.
Mëngjesin e sotëm ka përfunduar “pauza humanitare”, e cila hyri në fuqi të premten e 24 nëntorit në orën 08:00 si pjesë e marrëveshjes mes Izraelit dhe Hamasit.
Pas përfundimit të “pauzës humanitare”, ushtria izraelite vazhdoi sulmet e saj në Rripin e Gazës.
