Në një hap të paprecedentë, një delegacion diplomatik izraelit po viziton aktualisht Arabinë Saudite për të marrë pjesë në një konferencë të UNESCO-s në kryeqytetin Riad, raporton Anadolu.
“Unë mund të konfirmoj se një delegacion izraelit po merr pjesë në konferencën e UNESCO-s në Arabinë Saudite”, tha një zyrtar izraelit për Anadolu, duke kërkuar të mbetet anonim.
Burimi konfirmoi se është hera e parë që një delegacion izraelit po bën një vizitë zyrtare në Arabinë Saudite, e cila nuk ka marrëdhënie zyrtare me Izraelin.
Delegacioni izraelit përbëhet nga zyrtarë të Ministrisë së Jashtme, shtoi burimi.
Radioja e ushtrisë izraelite raportoi javën e kaluar se qeveria saudite i kishte refuzuar vizat e hyrjes si ministrit të Jashtëm Eli Cohen, ashtu edhe ministrit të Arsimit Yoav Kisch, për të marrë pjesë në të njëjtën konferencë ndërkombëtare.
Në muajt e fundit, zyrtarët izraelitë kanë folur për normalizimin e mundshëm të afërt të lidhjeve me Arabinë Saudite, por Riadi ka konfirmuar vazhdimisht se kjo nuk do të ndodhë derisa të arrihet një zgjidhje për konfliktin izraelito-palestinez.
Riadi po mirëpret aktualisht Konferencën e Trashëgimisë Botërore, organizuar nga UNESCO-ja, në datat 10-25 shtator. /trt
